CEBU, Philippines – Nalandig sa tambalanan ang 56-anyos nga lalaki human napusilan sa kapolisan gumikan sa pagsuway og sukol dihang kini gisita sa mga polis sa paghupot og armas niadtong nakalabay nga gabii sa SRP, sitio San Roque, Mambaling.
Ang napusilan giila nga si Romulo Marina, taga sitio Mangga sa maong barangay.
Matud ni PO3 Diosdado Andales, desk officer sa Mambaling Police Station, nga unang nakadawat og tawag ang kapolisan may labot sa usa ka armadong lalaki nga nasigpatan sa maong lugar.
Sa pag-abot nilang PO1 Ian Jude Motellano ug PO1 Ronnel Cabansay ilang nakita ang usa ka lalaki nga natukma sa gihulagway sa nitawag kanila ug giduol.
Nagpaila sila nga mga polis apan nibunot og armas ang suspek hinungdan nga kini gi-unhan na lang sa pagpusil ni Motellano igo sa paa.
Gidala sa mga polis sa Vicente Sotto Memorial Medical Center ang suspek kinsa nakuhaan og usa ka .38 revolver, napulo ka mga bala, usa ka holster ug sling bag. – /GMR) (BANAT NEWS)