Isnatser gigukod sa mga tanod, pasahero
CEBU, Philippines – Nadakpan sa nagtinabangay sa paggukod nga barangay tanod sa Tabok, dakbayan sa Mandaue ang 22-anyos nga lalaki nga nanglabni og cellphone sa pasahero nga babaye alas 11 pasado ang takna sa niaging gabii.
Ang nadakpan mao si John-John Romero, taga barangay Casili, sa maong dakbayan, kinsa nilabni sa Samsung Rex20 ni Jeniza Berdanillo, 19-anyos, dalaga nga kawani sa SM City Consolacion.
Si SPO1 Gregorio Cabizares sa Presinto 3 sa Mandaue City Police Office (MCPO) niingon nga nikapyot ang suspek sa public utility jeepney nga gisakyan sa biktima paghiabot sa eskina Paknaan.Paghidangat sa eskina Tabok, kalit lang gilabni ang cellphone sa biktima dayun ambak ug nidagan pahilayo.
Ang biktima ug kaubang pasahero nakasinggit sa pagpangayo’g panabang ug gitudlo ang suspek nga nagdagan ug ang mga barangay tanod nga sila si Benjamin Cañete, Arnold Ruta, Isidro Velasco, Ricardo Aying ug Makleus Perez ang dali nga nigukod.
Wala na makadagan ang suspek dihang pipila ka pasahero nga lalaki sa laing PUJ ang nanganaug ug misugat hinungdan sa pagkasikop sa suspek.
Nakuha sa mga barangay tanod ang cellphone sa biktima, usa ka hunting knife nga pito ka pulgada ang gitas-on ug usa ka syringe nga gituohang gigamit sa pag-adik-adik. – /GMR) (BANAT NEWS)
- Latest
