Gisuwaya’g lugos gidunggab, angol

CEBU, Philippines – Grabeng naangol ang usa ka dalaga nga gidunggab sa misuway unta sa paglugos kaniya sulod sa ilang panimalay sa sitio San Vicente, Tabok, dakbayan sa Mandaue alas 9 pasado ang takna sa niaging gabii. Si PO1 Paulino Borja Jr., sa Mandaue City Police Office (MCPO) niila sa biktima nga si Gely Formentera, 21-anyos ug kawani sa SM City Consolacion. Ang suspek nga gitabangan og kulata sa nakadakop nga mga silingan mao si Niño Roan Flores, 38-anyos, minyo ug bayaw sa biktima nga taga sitio Santo Niño, Umapad sa maong dakbayan.

Si Borja miingon nga hubog nga nahidangat sa gipuy-an nga panimalay ang suspek ug nangita sa asawa nga igsuon sa biktima. Gitawagan sa biktima ang iyang igsuon sa iyang cellphone ug gitanyagan ang suspek sa paglingkod samtang magpaabot sa paghidangat sa iyang asawa. Samtang naglingkod ang suspek, sa paglabay sa biktima kalit lang kini’ng gibunlot ug gipanghikap ang pribadong bahin sa iyang lawas. Ang biktima nga nidumili sa dautang tinguha sa suspek ang misuway unta sa pagkisikisi aron sa paglingkawas apan gidunggab na hinuon sa makadaghan nga nakaingon sa grabe nga pagkaangol sa biktima. Nakahigayun sa pagpangayo’g panabang ang biktima sa iyang mga silingan nga nakaaghat unta sa maong suspek sa pagsibat apan gitabangan kini og gukod hangtud nadakpan ug gitabangan sa pagkulata nga maoy hinungdan sa grabeng bun-og nga naangkon.

Ang biktima dali nga gihatud sa tambalanan ug ang suspek human katambali ang mga bun-og nga naangkon gitanggong sa detention cell sa kapolisan. – /GMR) (BANAT NEWS)