CEBU, Philippines – Usa ka wala pa mailhing kawatan ang nakonsensiya ug niuli sa nahibiling P92 mil nga iyang nasakiyo sa pagpanglungkab sa balay sa tresurera sa simbahan sa San Agustin sa lungsod sa San Fernando niadtong Domingo.
Matud ni PO1 Erwin Oyao sa San Fernando Police Station nga gibutang ang kwarta sa lamesa nga nahimutang sa gawas sa panimalay ni Maria Taña Benigra, 58, taga Cabatbatan, sa maong lungsod.
Si Benigra nitaho sa buhatan sa kapolisan niadtong Domingo tungod sa pagpanglungkab nga nahitabo sa balay niini.
Base sa imbestigasyon, sa pag-uli sa biktima gikan og simba, iyang naabtan nga abli na ang ilang kusina ug guba na ang bintana.
Kapin sa P100 mil ang nawala nga kwarta sa Coop sa Parish Pastoral Council, nga gitagana sa pagpalit og mga construction materials alang sa simbahan ug halin sa ilang negosyo.
Nagduda ang biktima nga silingan ra ang nihimo sa krimen tungod kay aduna'y mga nakakita atol sa panghitabo.
Samtang usa ka simbahan sa dakbayan sa Carcar ang gilungkab usab niadtong Domingo.
Matud ni Bishop Antonio Sabala Jr. nga nakalitan na lang siya’ng abli na ang pultahan sa iyang opisina ug guba na ang door knob niini pasado alas 8 sa buntag.
Sa iyang pagsusi, nahanaw na ang usa ka computer set nga mobalor og P50 mil samtang ang kaha sa pikas kwarto gisuwayan usab pagguba apan pakyas ang suspek. – /GMR) (BANAT NEWS)