Road projects ipahunong atol sa Sinulog

CEBU, Philippines – Ipahunong ni Cebu City Mayor Michael Rama ang tanan road projects sa dakbayan sa Sugbo sa dili pa magsugod ang paglusad sa Sinulog 2015 ug giawhag usab ang mga construction firms nga paspasan paghuman ang ilang mga proyekto aron malikayan ang dakong problema sa trapiko sa siyudad.

Gusto ni Rama nga maagian ang tanan dalan sa dakbayan ilabi na ang S. Osmeña nga maoy usa nga agianan sa mga motorista gikan ug padulong sa dakbayan sa Mandaue.

Dugang pa niya nga kinahanglan nga walay libaong ug luwas nga agian sa mga motorista.

Sa laing bahin, giawhag sa mayor ang tanan nga maghiusa  alang sa kalampusan sa Sinulog 2015.

Magsugod karong Enero 9 ang pormal nga paglusad sa Sinulog 2015 ug mao usab ang unang adlaw sa nobenaryo ni Senyor Santo Niño.

Sa pagsaulog unya sa Sinulog, nanghinaot si Rama nga magsugod dayon og pagpakabana ang mga tawo ilabi na kadtong mga tapulan aron tabangan ang mga nanginahanglan.

Iyaha usab gidasig ang tanan sa pagtambong sa mga religious activities sa kapistahan sa Senyor Sto. Niño kay matud pa niya, ang mga Sugboanon mao ang Sinulog.

Duha ka mga aspeto ang giandam sa siyudad alang sa tinuig nga Sinulog, ang relihiyosong aspeto nga gidumala ug gipasiugdahan sa simbahan ug ang aspetong may kalabotan sa kultura nga mao ang Sinulog dance competition ug Sinulog Grand Parade ug mga kauban niining kalihokan dinhi sa dakbayan sa Sugbo.

Sa laing bahin, walay bakasyon ang tanang mga sakop sa Cebu City Traffic Operation Management sugod Enero 9, 2015 atol sa unang adlaw sa paglusad sa Sinulog 2015.

Si CITOM Operations Officer Jonathan “Joy” Tumulak nagkanayon nga walay magbakasyon sa maong mga adlaw hangtud nga matapos ang kalihokan sa Sinulog.

Ang mga traffic enforcers ug mga traffic aides gimandoan nga mo-duty nianang mga adlawa aron pagmenus sa problema sa trapiko sa maong mga adlaw.

Samtang andam na usab ang kapolisan alang sa maong kalihokan, ang Officer In-Charge sa CCPO nga si Senior Superintendent Conrad Capa mimando na sa pagsubay sa mga rota nga agian sa mga prosisyon ug parada.

Dugang usa ka libong polis ang idugang sa kasamtangang kapin usa ka libong polis sa CCPO, tabangan usab kini sa puwersa sa Central Command ug mga force multipliers sama sa mga kadete, tanod, ug anti-crime volunteers. – /EIM) (BANAT NEWS)