Kontrata sa usa sa na-missing nga crew matapos sa Pebrero

CEBU, Philippines - Nagmalaumon gihapon nga buhi pa ang  anak sa usa ka inahan nga usa sa mga Filipino crew sa nalunod nga bulk carrier didto sa nasud sa Vietnam niadtong Biyernes.

Si Brenda Helen Toribio, 55, sa Sta. Fe, Cebu, nga nakahinabi sa Banat News mikompirmar nga iyang anak nga si Renato Toribio II,usa sa mga crew sa nalunod nga Bulk Jupiter nga nagkarga og 46 mil ka toneladang iron ore gikan Malaysia padung sa China.

Matud ni Brenda nga nakahibawo siya sa insidente human mitawag ang usa ka staff sa Magsaysay Maritime Corporation – Cebu ang ahensya diin iyang anak nagtrabaho niadtong gabii sa Biyernes. Apan, hangtod karon, wala gihapon siya’y update kun nakit-an na ba kini. Si Brenda miingon nga padayon ang pag-ampo sa iyang pamilya para sa kaluwasan sa iyang anak.

Bisan sa iyang kakuyaw, matud niya nga malaumon siya nga maka-survive ang tanang na-missing nga crew members.  Masaligon si Brenda sa eksperiyensya  sa iyang anak ug dili na kaayo siya makuyawan. Karong bulan sa Pebrero unta matapos ang kontrata sa anak. Ang pamilya sa iyang anak iyaha nga nagpuyo na sa Chicago sa Amerika iyaha nang napahibalo sa nahitabo.

Kataposan silang nagkaestorya sa anak niadtong Disyembre nga nagpahibalong napalit na niini ang gisaad niini kaniya.  (BANAT NEWS)