CEBU, Philippines - Ipadayun sa Provincial Tourism Commission ang Suroy-Suroy Sugbo human sa Sinulog 2015 bisan nangaguba sa bagyong Seniang ang mga lugar sa habagatan nga maoy bisitahon sa grupo.
Si Bise Gob. Agnes Magpale, chairman sa committee on tourism sa hunta probinsiyal, nagkanayon nga ang PTC mopahigayun og tigum aron hisgutan ang kalihukan.
Walo ka lungsod sa habagatan ang naka-angkon og grabeng kadaut sa bagyong Seniang diin lakip niini ang lungsod sa Alcantara, Dalaguete ug Argao nga gikatakdang suroyon sa mokuyog sa Suroy-Suroy.
Matud ni Magpale nga posibleng mausab ang itinerary apan paningkamutan nila nga mapadayun karong Enero 21, 22 ug 23 diin 80 na ka mga langyaw, lokal nga turista ug balikbayan ang nakapalista nga mokuyog.
Target sa PTC ang 200 ka guests nga mokuyog sa Suroy-Suroy.
Si Magpale nanghinaut nga maayo sa labing dali nga panahon ang tulay nga naputol sa lungsod sa Sibonga.
Dugang ni Magpale nga ang i-promote nila karon mao ang eco-tourism. Sayo niini ang mga lokal nga kagamhanan giawhag ni Magpale nga pauswagon ang ilang eco-tourism sites sama sa mga waterfalls aron mabutangan og karsada aron sayun mabisitahan. (BANAT NEWS)