CEBU, Philippines - Nagnihit na ang supply sa gasolina ug krudo sa habagatang bahin sa probinsiya sa Sugbo nunot sa pagkaputol sa tulay sa barangay Dumlog, lungsod sa Sibonga atol sa bagyong Seniang.
Sa report sa DYLA, si Kong. Wilfredo Caminero sa ikaduhang distrito kinsa nanag-iya og gasoline station sa lungsod sa Argao, nagkanayun nga gi-rasyon na lang niya ang ilang pundong gasolina aron makaabot karong adlawa.
Ang mga gagmay’ng sakyanan sama sa motorsiklo, multicab ug awto lang ang ilang baligyaan og gasolina.
Kagahapon sa hapon si Gob. Hilario Davide III personal sab nga nisusi sa kondisyon sa nahisgutang tulay.
Si Davide nakigtagbo kang Department of Public Works and Highways (DPWH) Assistant Secretary Dimas Soguilon ug District Engineer Nicomedes Leonor, Jr. diin ilang gihisgutan ang pagbutang og temporaryong steel bridge sa lugar ug temporaryong access road gikan sa Sibonga paingon sa kasikbit nga mga lugar.
Kauban sa maong tigum si Sibonga Mayor Lionel Bacaltos ug Kong. Gerald Anthony “Samsam” Gullas Jr. sa unang distrito diin sakop ang maong lungsod.
Atol sa tigum sa mga department heads sa Kapitolyo kagahapon, ang hepe sa Provincial Disaster Risk Reduction Management Office (PDRRMO) nga si Baltazar Tribunalo nibutyag nga moabot sa P800 milyones ang danyos sa habagatan ug posibleng mosaka pa kini tunggod kay padayon pa ang ilang assessment.
Matud ni Tribunalo nga walo ka lungsod sa habagatan ang apektado sa bagyong Seniang.
Nunot niini gipahibawo ni Davide nga magpatabang sila sa nasudnong kagamhanan sa pag-abaga sa pagpaayo sa mga nangaguba sa bagyo.
Matud ni Davide nga mangayo sila og tabang gikan sa national nga kagamhanan tungod kay dili maabaga sa probinsiya ang nahisgutang danyos sa bagyo. (BANAT NEWS)