Rama ireklamo pag-usab ni Delute

CEBU, Philippines - Paimbestigahan ni Atty. Reymelio Delute  ngadto sa Ombudsman of Visayas si Cebu City Mayor Michael Rama kun aduna ba kini kalapasan sa balaod sama sa technical malversation tungod sa paggamit sa P300 milyones nga gahin unta alang sa drainage project sa Mahiga Creek ug ang wa makompletong financial assistance sa mga senior citizens nga gigamit hinuon alang sa pagpatukod sa Phase 1 sa Cebu City Medical Center.

 “Tungod sa walay koy igo nga ebidensya nga gikuptang mga dokumento nga naa sa city hall, ang akong 2nd option paimbestigahan sa Ombudsman,” matud ni Atty. Reymelio Delute. Si Delute mao usab ang misang-at og reklamo batok kang Rama ug mga sakop sa Konseho tungod sa paghatag og financial assistance nga tag P20 mil sa tanang mga kawani ug mga opisyal sa siyudad niadtong 2013 human sa bagyong Yolanda.

Dugang pa ni Delute nga gusto niyang masusi sa Ombudsman kun nag-abuso sa iyang gahom si Rama.

Giklaro ni Delute nga dili sa pagpanggukod ang iyang tumong apan pagpahibalo sa katawhan sa nanghitabo sa kwarta sa siyudad.

Niadtong Disyembre 21, 2014 nakadawat og tag P3 mil ang mga  senior citizen ug karong bulana gikatakda nga ihatag ang dugang P2 mil nga financial assistance

Karong tuiga himuon ang rebidding sa Bids and Award Committee aron sa paglimpyo sa mga isyu sa pagpatukod sa bag-o nga Cebu City Medical Center. (BANAT NEWS)