CEBU, Philippines - Tulo ka tawo ang namatay human sa usa ka “head-on collision” kagahapon sa kaadlawon diha sa North Road sa barangay Jagobiao,dakbayan sa Mandaue.
Si Police Officer 3 Melvin Leones sa Mandaue City Traffic Division miila sa mga namatay nga sila si Pedro Tumulak,32, taga barangay Pagsabungan, dakbayan sa Mandaue ug ang iyang angkas nga si Victor Manatad Jr., 25, taga dakbayan sa Lapu-Lapu, samtang ang driver sa laing motorsiklo nga ilang nakabangga pabilin pa nga wa mailhi hangtud ning pagsulat sa balita.
Si Leones nagkanayon nga ang mga nagbangga pulos mga Honda XRM ang usa adunay plakang 780-1246-613 ug narehistro ubos sa pangalan ni Lyka Jane Domen sa Ibabao,Cordova apan ang nagmaneho niini wa pa gihapon mailhi.
Samtang ang laing motor nagtangag og plakang 780-1326-203 nga gimaneho ni Tumulak. Ang duha padulong unta usab sa dakbayan sa Sugbo nianang tungora.
Ang tulo gidala sa Vicente Sotto Memorial Medical Center sa dakbayan sa Sugbo apan gideklarar sila nga ” dead on arrival.” Si Leones nagkanayon nga ilaha pang gisusi kun kinsay sad-an sa duha ka drayber sanglit pulos patay ang duha ug ingon man ang usa ka angkas. (BANAT NEWS)