CEBU, Philippines - Moabot sa 20 ka balay ang naugdaw ug 30 ka pamilya ang nisugat sa bag-ong tuig nga wala’y mga balay human sa sunog nga niulbo sa Upper Bonbonan, Labangon, dakbayan sa Sugbo pipila ka oras sa wala pa ang tuig 2015.
Matud pa ni SFO1 Alberto Jagdon, imbestigador sa Bureau of Fire Protection, nga nadawat ang alarma alas 7:20 sa gabii ug gipaubos sa Task Force Alpha.
Sa inisyal nga imbestigsyon nasayran nga ang kandila nga napasagdan ang hinungdan sa sunog gikan sa ubos sa balay ni Antonio Zapra nga gipuy-an ni Lilia Rosaceña nga wala diha sa hitabo ug giingong may nagpuyo nga usa ka tiguwang babaye nga wala pa mailhi.
Gawas sa kagamay sa dalan ug wala’y fire hydrant, si Jagdon nagkanayun nga problema sab kaayo ang mga tawo sa maong lugar nga nangilog na sa hose sa bombero ug ang uban nisaka na sa mga fire truck kay gustong unahon pagpawong ang ilang balay.
“Saksi gyud si sir Bongabong (City fire Marshall) kung unsa ang gihimo sa mga tawo. Ang uban lagi kulang na lang mo-drive sa fire truck, unya padunggan pa mi og estorya nga dili maayo. Wala man gud sila kasabot sa trabaho namo asa among unahon,” pasabot ni Jagdon.
Hinuon atol sa maong hitabo wala sa’y natala’ng namatay o naangol.
Alas 11:28 na sa gabii gideklarar nga fire out ang sunog ug gibana-bana nga may gibilin nga P300 mil nga danyos. (BANAT NEWS)