CEBU, Philippines – Giplano sa kagamhanan sa dakbayan sa Mandaue ang pagtukod og edipisyo nga magsilbing evacuation center sa mga molupyo gikan sa kabarangayan sa panahon nga adunay katalagman sama sa bagyo nga kuyaw nga masinati ang mga pagbaha o pagdahili sa yuta.
Si Atty. Jamaal Calipayan nga maoy executive secretary ni Mayor Jonas Cortes miingon nga adto sila mokuha unya sa pundo pagtukod niini sa Bottom-Up Budgeting program sa Department of Interior and Local Government (DILG).
Ubos sa maong programa, ang mga local government units maghimo og mga proyekto nga kapahimuslan sa labing kabus nga mga lumolupyo niini.
Mokabat og P48 milyones ang balor sa mga proyektong gitugot sa DILG nga angay planuhon sa LGU, ug gikan sa maong pundo kuhaon ang gibanabanang P6 milyones ngadto sa P10 milyones nga evacuation center nga planong tukoron sa Mandaue City.
Matud pa ni Calipayan kun matukod na ang maong edipisyo, dako kini kaayo og matabang sa mga evacuees nga maapektahan unya sa mga baha ug pagdahili sa yuta sa dakbayan.
Sa pagkakaron, ang siyudad sa Mandaue mipatuman og clustering sa 27 ka mga barangay alang sa paspas nga pagtubag sa panginahanglan sa mga molupyo panahon nga dunay katalagman.
Ang kuyaw nga makasinati og mga pagdahili sa yuta mao ang cluster nga kabukiran nga gilangkoban sa Casili, Tawason, Cubacub, Basak, Pagsabungan ug Canduman. (BANAT NEWS)