Sinulog andam na

CEBU, Philippines – Ang kadagkoan sa Sinulog Foundation Inc. (SFI) naniguro nga daghan gihapon ang mga makalingaw nga pasundayag atol sa Sinulog Grand Parade karong Enero 18.

Pagka karon 37 na ka contingents gikan sa dakbayan ug kalungsuran sa Sugbo, ingon man sa ubang mga dapit sa nasud, ang nagpalista nga moapil sa pagsayaw atol sa grand parade.

Si SFI Executive Director Ricky Ballesteros mitug-an nga ang 15 ka contingents gikan sa dakbayan sa Sugbo, 12 gikan sa kalungsuran sa probinsya ug ang laing napulo ka contingents mga “out-of-town.”

Matud ni Ballesteros nga manawat pa sila og mga contingents nga gusto’ng musalmot sa grand parade hangtod Enero 10, ilabi na kadto’ng mga gikan sa lagyo nga mga dapit.

Gisiguro ni Ballesteros nga daghan gihapon ang mobisita sa Sugbo atol sa kasaulogan sa pangilin ni Senyor Santo Niño dungan sa pagbisita dinhi sa nasud ni Pope Francis.

“We can show also nga dili matabunan ang atong selebrasyon sa Cebu. We make sure nga it is going to be religious. For me it will also compliment the pope’s visit,” matud ni Ballesteros.

Ang Santo Papa muadto sa Tacloban City atol sa pagpahigayon sa Sinulog Grand parade aron makigtagbo sa mga biktima sa bagyo’ng Yolanda.

Matud ni Ballesteros nga kada tuig ilang gipaningkamotan nga munindot pa ang production, ang stage, mga performances ug uban pa nga kalihukan sa Sinulog activities.

“As you can see every year naa g’yud mi something to look forward. Every year, we come up with new ideas so even the stage evolve also from the small to biggest, design and even the music,” ni Ballesteros.

Alang sa Sinulog-based, free interpretation ug best in street dancing categories, ang first placer makadawat og P1 million. Dayon ang second placer makadawat og P700 mil.

Ang third prize winner makadawat usab og P500 mil, dayon P300 mil sa fourth placer ug P200 mil sa fifth placer. Aduna ‘say madawat nga P100 mil ang mapili nga Best in Costume ug Best in Musicality.

Sa miagi’ng mga Sinulog, ang second placer nakadawat lang og P500 mil, P300 mil sa third placer, P200 mil sa fourth placer ug P100 mil sa  fifth placer.

Matud ni Ballesteros nga gipatas-an nila ang premyo aron makabawi-bawi og gamay sa gasto ang mga mudaog nga contingents.

Ang SFI migahin og P45 milyones nga budget karong tuiga samtang ang kagamhanan sa dakbayan sa Sugbo maoy moabaga sa prizes. Gusto g’yud unta ni Mayor Michael Rama nga apil ang Sugbo nga bisitahan ni Pope Francis mao nga padayon siya nga naghangyo mutan-aw unta kini sa kalihukan.

Ang naila nga San Diego Dancers mosayaw hinuon og Sinulog atubangan sa Santo Papa atol sa pagduaw niini sa Manila sa dili pa kini muadto sa Tacloban      City.

Si Vice Mayor Edgardo Labella miingon nga gawas sa mga usa ka libo ka polis nga ipakatap dinhi sa dakbayan atol sa kasaulogan sa pangilin ni Santo Niño, daghang peacekeeping volunteers ang mutabang sa pagpatunhay sa kalinaw. (BANAT NEWS)