Seniang nikusokuso sab sa Lapu
CEBU, Philippines – Nakasinati usab og kadaut ang dakbayan sa Lapu-Lapu sa pagkuso-kuso sa bagyong Seniang diin dunay mga kahoy nga nangatumba, pamilya nga nibakwit ingon man power interruption.
Hinuon gihulagway ni Andy Berame, City Disaster Risk Reduction Management Officer, nga dili sama ka grabe ang kadaut nga nahiaguman sa habagatang bahin sa Sugbo nga dunay mga tulay nga naputol ug niawas ang kasapaan ug may nakalas nga kinabuhi. Pito ka pamilya ang nibakwit diin upat niini gikan sa barangay Tingo ug laing tulo sa barangay Subabasbas kinsa nagpuyo daplin sa baybayon. Sa 31 ka barangay sa siyudad, ang barangay Tingo ang grabeng naapektuhan tungod kay nabantang sa hanging Amihan.
Nasayran nga 40 porsiyento sa siyudad nakasinati og power outage apan matud ni Berame gikinahanglang pawngon ang linya sa kuryente ilabi na sa mga lugar diin mga kahoy nangatumba aron dali ra ang pagpahigayun sa clearing operation.
Hinuon ang siyudad wala’y natala nga landslide ug pagbaha. Samtang duha ka menor de edad nalandig sa tambalanan human naigo sa midahiling yuta sa barangay Danglag, Consolacion niadtong Lunes sa udto. Nasayran nga nagduwa ang 7 ug 12 anyos nga mga lalaki duol sa usa ka quarry nga gipanag-iya ni Barangay Kapitan Artun Quimod.
Daling gidala sa mga sakop sa Consolacion Emergency Rescue Team (CERT) sa tambalanan ang mga biktima kinsa nakaangkon og minor injuries. – /GMR) (BANAT NEWS)
- Latest
