Nag-selfie sa putol nga tulay gibadlong

CEBU, Philippines – Human sa pagkaputol sa usa ka tulay sa barangay Dumlog, lungsod sa Sibonga kagahapon, dali nga niresponde ang kapolisan sa lungsod sa Argao aron pagbantay sa katawhan sa mao’ng lugar ilabina ang mga mahilig mag-selfie.

Matud ni Police Insp. Alejandro Batobalonos, hepe sa Argao Police, nga standard operating procedure na sa kapolisan nga moresponde dayun sa ilang silingan nga lugar kung may daku nga katalagman nga mahitabo.

Pasado alas 6 sa buntag naabot sa lugar ang kapolisan sa Argao ug nitabang sa usa ka polis sa Sibonga nga na-una’ng nagbantay sa tulay nga naputol. Gibadlong ang mga tawo nga igo lang motan-aw sa tulay nga naputol ug nag-selfie.

Usa sa nabantayan ni Batobalonos nga ang gitongtongan sa mga tawo nga aspaltado’ng dalan ang wala na’y yuta sa ilawom kay gibanlas na sa baha.

“Ang uban man gud hilig kaayo og picture, uban usyosiro kaayo, delikado baya kaayo to’ng dapita, pag-abot namo daghan na gyud nagtapok,” sigun pa ni Batobalonos.

Pasado na alas 8 sa buntag nibiya sa lugar ang kapolisan sa Argao human laing mga polis ang naabot.

Sigun pa ni Batobalonos nga didto na moagi ang mga sakyanan sa bukirang bahin sa ilang lungsod aron makalahos sa ilang destinasyon.

“Mao ni amo giatiman karon nga dalan kay kana’ng naputol nga tulay seguro mga lima pa na ka buwan ayha maayo seguro. So kini nga rota mao na gyud na ang agianan sa mga dagku nga sakyanan,” dugang pa ni Batobalonos. – /GMR) (BANAT NEWS)