CEBU, Philippines – Nagtinguha ang kagamhanan sa dakbayan sa Mandaue nga mokuha og third party nga mo-assess sa balor sa Cebu International Convention Center (CICC). Si Atty. Jamaal James Calipayan, executive secretary ni Mayor Jonas Cortes, nipahibawo nga ang Development Bank of the Philippines (DBP) ang usa sa ilang gihangyo sa paghimo og assessment sa maong edepisyo.
Ang managlahi nga appraisal value sa maong edepisyo nga giluwatan sa kagamhanan sa lalawigan sa Sugbo ug dakbayan sa Mandaue ang nakaaghat sa CICC Board sa pagkuha og third party sa paghimo og assessment.
Si Atty. Carlo Fortuna, consultant on district affairs sa dakbayan sa Mandaue, nibutyag nga mokabat lang sa P200 milyones ang tanyag sa dakbayan sa ilang pagpalit sa maong edepisyo.
Ang maong kantidad labing ubos sa appraisal value sa kagamhanan sa lalawigan sa Sugbo nga mokabat sa P600 milyones.
Ang CICC gitukod sa kantidad nga P800 milyones ni kanhi gobernador Gwendolyn Garcia.
Nakasinati og kadaut ang maong edepisyo sa pagtay-og sa 7.2 magnitude nga linog niadtong 2013 ug gisundan usab sa pag-igo sa bagyong Yolanda hinungdan sa kadaut nga naangkon ug wala na magamit hangtud karon. – /GMR) (BANAT NEWS)