CEBU, Philippines – Wala’y suwerte ang 26-anyos nga lalaki human gisikop sa pagdala og peke nga kuwarta sa may dalan D. Jakosalem, barangay Kamagayan, dakbayan sa Sugbo pasado alas 11 sa buntag sa nakalabay nga adlaw.
Ang dinakpan naila nga si Henegrey Pangalan, ulitawo, wala’y trabaho ug taga barangay Tinago.
Matud ni PO1 Milrose Villanos, desk officer sa Pari-an Police Station, nga duna’y nakasumbagay si Pangalan sa mao’ng lugar hinungdan nga gisikop sa mga tanod sa barangay Kamagayan nga sila si Ricky Mansing, Noe Vargas ug Rae Ong.
Didto sa buhatan sa kapolisan atol sa pagrekisa sa mga tanod nakuhaan og peke nga salapi si Pangalan nga nagkantidad og P3,400.
Sumala pa ni Villanos nga wala sab mitug-an kanila ang dinakpan kung asa gikan ang maong mga peke nga mga kuwarta.
Kaso’ng paghupot og peke nga salapi ang gi-atubang nga kaso ni Pangalan nga kasamtanga’ng gitanggong sa Pari-an Police Station. – /GMR) (BANAT NEWS)