Kunhod sa plete huwat sa LTFRB
CEBU, Philippines - Dili pa mapatuman ang pagpakunhod sa pletehan sa mga bus ug mini-bus sa probinsiya sa Sugbo.
Kini bisan gipirmahan na ang memorandum of agreement (MOA) tali sa mga bus ug mini-bus operators ug sa kagamhanan sa probinsiya niadtong Lunes alang sa pagpakunhod sa pletehan isip pinaskohan sa mga pasahero.
Gikan sa P6 nga pletehan sa unang lima ka kilometro paubsan ngadto sa P5 ug ang P1.20 sa matag mosunod nga kilometro himuo’ng P1.
Si Gob. Hilario Davide III mihangop sa lakang sa mga operators.
Giduso sa bus ug mini-bus operators ang petisyon ngadto sa Land Transportation Franchising and Regulatory Board (LTFRB) sa pagpakunhod sa pletehan.
Si Julieto Flores, presidente sa Cebu South Mini-Bus Operators Association, nagkanayun nga nakapahimulos sila sa barato nga krudo ug kinahanglan usab nga makapahimulos ang publiko sa baratong plete.
Matud niya nga gamiton nila ang MOA isip supporting document aron mapadali ang pagproseso sa LTFRB sa pagpakunhod sa pletehan. Ang pagkunhod sa pletehan mapatuman kini kung ang LTFRB moluwat na og kamanduan niini. (BANAT NEWS)
- Latest
