CEBU, Philippines - Mosang-at og reklamo sa Kampo Crame ang usa ka survivor sa pagbanhig patay kang Atty. Noel Archival nga si Paolo Cortes batok sa mga kanhi opisyal sa Highway Patrol Group-7.
Matud ni Atty. Rameses Villagonzalo, kasong absence without official leave (AWOL) ang ilang iduso batok nilang Senior Superintendent Romualdo Iglesia, Senior Inspector Joselito Lerion, ug PO1 Alex Bacani, ugmang adlawa.
Hinuon giklaro ni Villagonzalo nga makasang-at sila og reklamo’ng AWOL aron pagtangtang sa katungdanan sa hingtungdang mga opisyal apan ang Personnel Holding and Accounting Section (PHAS) sa HPG sa Kampo Crame ang makahukom kung ideklarar sila nga AWOL.
Si Iglesia, Lerion ug Bacani gitumbok nga suspek sa pagpatay kang Archival, drayber nga si Alejandro Jayme ug bodyguard nga si Candido Miñoza niadtong Pebrero 18, 2014 sa barangay Corro, lungsod sa Dalaguete.
Bag-o lang si Cortes pinaagi sa iyang abogado nipadala og suwat ngadto sa Armed Forces of the Philippines ug nangayo og tabang aron pagpangita sa tulo ka polis kinsa giingong wala na sa Kampo Crame.
Matud ni Villagonzalo nga wala pa sila nakadawat og tubag gikan sa AFP apan segurado nga nadawat na niini ang ilang suwat.
Dugang ni Villagonzalo nga padayun ang manhunt operation batok sa tulo ka polis. (BANAT NEWS)