CEBU, Philippines - Nasurpresa ang mga residente sa Sitio Pasil, Barangay Maslog sa dakbayan sa Danao pagkahibalo nga nagkubkob diay sa ilang tugkaran ang ilang silingan nga maoy hinungdan sa kamatayon sa upat ka tawo nga nakuryentihan sa miaging adlaw.
Ang tag-iya sa maong lungag nga gikubkob naila nga si Jessina Miguel ang inahan ni Jess Christian Miguel nga usa ‘sab sa nakalas.
Gihimakak hinuon ni Miguel ang taho nga ang maong lungag usa ka minahan ug matud pa niya sa mga tigbalita kay kini atabay.
Sa wala pa ang aksidente nakadungog pa ang mga silingan og buto tulo na ka buwan ang milabay nga daw may nag-blasting ilawom sa yuta ug misunod dayon pag-uyog sa yuta.
Gawas niana nakatimaho ‘sab ang mga silingan sa mga Miguel og dili masingo nga baho gikan sa maong lungag.
Apan ang inahan sa usa sa mga nakalas nga si Diomel Mayol sa interbyu sa dyAB nagkanayon nga minahan g’yud ang maong lungag.
Gani matud pa niya nga naay ayagan ang maong lungag ug kun wala pa unta niya tawga ang anak nga mo-rescue sa tulo hayan buhi pa unta iyang anak.
Nasulod sa lungag si Mayol human siya madakin-as ug nahulog sa lungag ug naapil sa nakuryentihan ug namatay.
Ang mga opisyal sa barangay gikatakdang moimbestigar sa hitabo.
Pasado alas onse niadtong Biyernes sa buntag, si Amick Bunconseho, gikatahong nangayo og tabang tungod kay misaka og kalit ang tubig sulod sa lungag.
Apan nasanapan sa tubig ang water pump nga gimontar sa sulod aron mohabwa sa tubig hinungdan nga nakuryentihan kini.
Mitabang sila si Ernesto Ogabao, 49 ug si Jess Christian Miguel, 21, apan sila ‘sab nakuryentihan.
Ang inahan ni Mayol, 19, nga nabalaka tungod kay nakadungog siya sa sangpit sa silingan miadto ug mi-rescue unta sa mga nakuryentihan.
Matud pa nga buot sa mga Mayol ug sa ubang residente sa Sitio Pasil nga papahawaon si Jessina sa ilang lugar. (BANAT NEWS)