CEBU, Philippines - Ang pagpaubos ug ang pagpadayon sa pag-alagad ngadto sa mga kabus gipahaom sa homiliya ni Cebu Archbishop Jose Palma sa katapusan nga Misa de Gallo sa dayon na sa tungang gabii sa pagsugat sa Pasko karong tuiga nga gipahigayon sa Cathedral sa Dakbayan sa Sugbo.
Gipasabot ni Palma nga ang Ginoong Hesukristo nagpakatawo sa kalibutan nga nagdala og bag-ong kahayag ug bag-ong paglaom sa katawhan.
Gihimo niyang sanglitanan sa pagpaubos ang Balaang Pamilya nga mipakatawo sa Batang Hesus sa pasongan.
Matud pa ni Palma nga ang pagpaubos maoy paagi sa pagdapit sa katawhan ug pinaagi sa pagpaubos padayunon unta sa matag pamilya ang Balaang Bata.
Ang tema karong umaabot tuig sa 2015 mao ang “‘Year of the Poor” nga diin hatagan og dakong pagtagad kadtong mga kabus ug mga nagkinahanglan. (BANAT NEWS)