Amahan nanagpa, nanuok sa anak gidakop

CEBU, Philippines - Gidakop ang usa ka amahan human gisagpa ug gituok ang iyang 17-anyos nga anak babaye nga nakig-inom sa mga amigo pasado alas 5 sa hapon niadtong bisperas sa Pasko sa sitio Can-ingan, Montserrat, lungsod sa Pilar.

Matud ni Police Officer 2 Adorberto Carba Jr. sa Pilar Police Station nga naghubog ang suspek sa kaguol nga dili magkakuyog uban ang iyang asawa sa pagsugat sa Pasko sanglit toa ang asawa sa Baybay, Leyte kauban ang laing anak.

Sa pag-uli sa suspek, gikompronta ang iyang anak nga babaye tungod kay dili kini mananghid kun moadto og laing lugar.

Sa pagpasabot sa biktima, gisagpa kini sa amahan. Sa kasuko sa biktima, nisuway kini pagsukol sa amahan apan gituok na hinuon hangtud nawagtangan og panimuot.

Daling gidala ang biktima sa tambalanan diin wala kini makamata sulod sa lima ka oras.

Ang suspek kasamtangang gibalhug sa Pilar Police Station apan ang pamilya nagdumili sa pagpasaka og kaso tungod kay unang higayun kini nga nabuhat sa amahan ug nakalitan lang kini.

Apan matud ni Carba nga iduso pa nila ang maong panghitabo sa Department of Social Welfare and Development (DSWD) tungod kay menor de edad ang biktima. (BANAT NEWS)