CEBU, Philippines - Gi-hostage sa giingong sabog nga lalaki ang 16-anyos nga iyang amigo sa public plaza sa Poblacion, lungsod sa Cordova alas 3 pasado sa kadlawon human sa pagsugat sa Pasko.
Si Senior Police Officer 1 Larry Wagwag sa Cordova Police Station miingon nga didto sa plaza ang managhigala dihang si Wilmar Talyao, 19, kalit lang niduol ug gibira ang biktima dungan ang pagtion og kutsilyo sa liog.
Si Wagwag miingon nga naglisud sila pagduol sa suspek apan sa paglabay sa kapin sa oras nga negosasyon, ang biktima nakahigayun sa paggunit sa bukton sa suspek ug nakiglayog hinungdan sa ilang paghamag ug nailog ang kutsilyo.
Ang mga residente nitabang sa paghamag sa suspek ug nagtinabangay sa pagkulata sa suspek.
Gidala ang suspek sa Mactan Doctor’s Hospital apan nag-wild hinungdan nga gibalik kauban sa mga ginikanan sa Cordova Police Station ug ang municipal nurse sa Cordova mao na ang nagtambal sa mga bun-og ug samad sa suspek. (BANAT NEWS)