CEBU, Philippines - Gilungkab ang lotto outlet sa Poblacion Oriental, lungsod sa Consolacion alas 7 pasado sa niaging gabii ug kagahapon sa buntag na nadiskubrehan.
Gipanag-iya ni Emma Browa ang lotto outlet ug ang igsuon nga si Jean Browa Bacol, 41, nga maoy teller, ang nakadiskubre sa pagpanglungkab.
Matud ni Senior Police Officer 1 Francisco Perez Jr. sa Consolacion Police Station nga natingala si Bacol nga naabli na ang pultahan sa lotto outlet ug sa pagsusi maoy nasuta nga gilungkab na ang kandado sa pultahan niini. Si Perez miingon nga gilugwatan ang kandado ug didto sa sulod gilungkab usab ang kaha nga sudlanan sa kuwarta nga kitaon sa matag adlaw ug nakuha ang P4,980 nga gibilin.
Lakip gisakiyo mao ang Apple iPad nga gibilin ni Bacol sa sulod sa kaha ug maoy gipuli sa sulod sa kaha ang bull cap nga gituohang iya sa kawatan.
Samtang gilungkab usab ang panimalay ni Konsehal Zosimo Abellanosa sa barangay Poblacion, dakbayan sa Toledo.
Matud ni Abellanosa nga nalimtan sa pagsirado ang luyo’ng pultahan ug didto niagi ang kawatan. Nakuha sa mga kawatan ang pitaka sa konsehal nga adunay sulod ng P5 mil ug mga IDs ingon man ang duha ka cellphones nga wala matino ang kantidad.
Gikan nitambong sa Misa de Gallo ang konsehal dihang pag-abot niya abli na ang luyo nga pultahan.
Si Abellanosa maoy chairman sa committee on peace and order sa konseho sa dakbayan sa Toledo. (BANAT NEWS)