CEBU, Philippines - Patay dihadiha ang usa ka 62-anyos nga amahan human giduslak og kutsilyo sa iyang 42-anyos nga anak nga giingong adunay sakit sa panghunahuna diha sa Sitio Adelfa, Barangay Poblacion, Pardo, dakbayan sa Sugbo.
Ang namatay mao si Raymundo Gabtana Abellanosa Sr., residente sa maong lugar kinsa gideklarar nga dead on arrival tungod sa naangkon niining samad dinunggaban sa walang dughan, likod ug tuong bukton.
Matud ni Police Officer 1 Junimar Ungab sa Homicide Section sa Cebu City Police Office (CCPO) nga wala na makatulog ang suspek nga si Raymundo Abellanosa Jr., sukad Huwebes sa gabii hangtud pagbuntag sa Biyernes tungod sa grabeng kaguol nga gibuwagan sa asawa ug wala na makakita sa duha niini ka mga anak.
Nianang pagkabuntag, samtang ang amahan sa suspek nag-andam sa mga lutuon sa ilang negosyong kan-anan, kalit nga niabot ang suspek ug giduslak ang amahan gamit ang kutsilyo.
Matud ni Erlinda Abellanosa, asawa sa biktima ug inahan sa suspek, nga adunay nervous breakdown ang iyang anak sukad pa niadtong tuig 2010 ug padayong nag-inom og tambal.
Apan bisan pa man niini, pasakaan niya kini og kaso nga parricide. (BANAT NEWS)