Mga trabahante nag-“welga”

CEBU, Philippines -  Kapin sa usa ka libo ka construction workers sa Adventurer’s Multipurpose Cooperative (AMCOOP) nga maoy nagtrabaho sa Avida Towers Cebu sa IT Park wala mosud sa ilang mga trabaho kagahapon sa buntag human nga wala maabot ang gisaad nga 13th Month Pay sa ilang kooperatiba.

Si Albert Limbeg, nga maoy nibarog nga tigpamaba sa mga trabahante kagahapon nga nahinabi sa Banat News miingon nga wala sila mitambong sa ilang trabaho tungod sa kapakyas sa AMCOOP sa pagtuman sa ilang saad.

Miingon si Limbeg nga duha na ka bulan nga gipasiatab sa AMCOOP nga hatagan sila’g 13th Month Pay sa unang semana sa Disyembre apan matud pa niya nga hapit na lang matapos ang bulan wala lang gihapon matuman ang ilang saad.

Sa miaging semana mipasalig na ‘sab ang ilang kooperatiba nga masulod na kagahapon sa ilang ATM accounts ang kwarta apan wala g’yud kini matuman.

Hinungdan nga nakahukom ang mga trabahante nga mohunong lang usa sa pagtrabaho.

Apan giklaro nila nga wala sila magwelga ug wala ‘sab sila mag-strike sanglit ila lang usa nga giuna ang pagpakisusi nganong nalangay ang ilang 13th Month Pay.

Usa ‘sab sa reklamo sa mga trabahante nga dako kaayo ang deductions sa SSS, PhilHealth ug PAG-IBIG sa ilang sweldo apan ilang nasayran nga wala i-remit sa AMCOOP ang ilang mga deductions.

Lakip sa ilang gireklamo ang giingong deductions sama sa labor cost nga naa sa ilang pay slip nga wala sila masayod kun asa padulong.

Mireklamo ‘sab ang mga trabahante nga ang oras unta sa ilang trabaho magsugod sa alas 7:00 sa buntag hangtod sa alas 4:00 sa hapon apan papansuhon sila alas-6 pa sa buntag ug kun dili sila makaabot niini maisip na sila nga late.

Gireklamo usab nila nga kun mopanso sila untop alas-4 sa hapon kuhaan ilang sweldo kay kuno “undertime” sila.

Usa sa mga trabahante ang mipasangil nga gitionan siya og armas sa guwardiya sa IT Park atol g’yud sa paghugop sa daghang mga trabahante sa atubangan nga bahin sa gitrabaho nilang building kagahapon.

Apan gihimakak kini sa supervisor sa guwardiya nga nagdumili magpahingalan ug matud pa niya nga igo lang nagkupot sa iyang service firearm ang guwardiya ug posible nga didto magbarog sa direksyon sa sumbohan sa armas ang maong lalaki.

Si Hernando Antonio, ang operations in-charge sa AMCOOP sa Cebu, miingon nga miangkon nga nadelatar lang gamay ang 13th Month Pay ug matud pa niya nga dili mahitabo nga dili sila hatagan niini kay mandato kini sa gobiyerno.

Iyang gipasalig nga sa Lunes moabot g’yud ang gipaabot sa mga trabahante ug gani makadawat ‘sab sila og dibidindo sa kooperatiba.

Matud pa ni Antonio nga sa Martes mahatag na ‘sab ang ilang sweldo sa sunod semana nga normal nga madawat nila sa tapos sa semana.

Wa na kini mohatag pa og tubag bahin sa ubang reklamo sa mga trabahante bahin sa ilang trabaho ug mga deductions.  (BANAT NEWS)