Trapik sa Sugbo nagkagrabe

CEBU, Philippines - Nimando si Cebu City Mayor Michael Rama nga sugod karong adlawa wala’y holiday ang mga traffic enforcers. Kini nunot sa grabeng kahuot sa dagan sa trapiko sa bisan asang dapit sa dakbayan sa Sugbo.

Ang operations officer sa City Traffic Operation Management, Joy Tumulak, miingon nga huot apan moving ang dagan sa trapiko sugod alas 5 sa hapon. Apan wala sila’y nadawat nga reklamo gikan sa mga motorista. Si Rama nagtinguha nga ipatangtang ang mga parking bays sa dakbayan sa Sugbo nga makamugna og grabeng traffic sa kadalanan

Tanan intersection sa kadalanan sa dakbayan ang butangan sab pirme og traffic personnel

Si CITOM Executive Officer Victor Caindec miingon nga dili gyud malikayan ang grabeng traffic sa kadalanan kay aduna’y pipila nga motorista nga dili mosunod sa lagda sama sa No Left Turn Policy.

Si Rama nihangyo sa mga traffic enforcers nga mo-extend sa ilang trabaho bisan usa ra ka oras.

Adunay upat ka shifting ang mga traffic enforcers nga mag-monitor sa traffic sa kadalanan sa dakbayan sa Sugbo. Samtang nasuko si Rama ngadto sa Department of Public Works and Highways human giingon nga ilegal ang Night Market sa dalan Colon.

Gihagit ni Rama ang DPWH nga makigtigi kaniya kung gusto nila nga undangon ang Night Market nga niresulta sa pagsirado sa karsada.(Sheriza Mae Uy ug Sheilame P. Medil, USJ-R Masscom Interns/GMR)(BANAT NEWS)