‘Hitman’ napatay sa CIB
CEBU, Philippines - Patay ang usa ka hitman human nisuway og sukol sa mga sakop sa City Intelligence Branch (CIB) sa Cebu City Police Office (CCPO) sa barangay Lorega-San Miguel pasado ala una sa niaging kadlawon.
Ang biktima naila nga si Rosalino Lambo, 32, ulitawo,taga sitio Itom Yuta sa maong barangay.
Matud ni Supt. Romeo Santander, hepe sa CIB, nga una nila’ng nadawat ang usa ka alarma gikan sa tawag sa usa ka concern citizen may labot sa usa ka armado nga tawo sa mao’ng lugar.
Sumala pa nga kuyog ang lain nga kauban ni Lambo sila nag-inom atubangan sa usa ka tindahan ug nagpakita kini sa dala’ng armas hinungdan nga gi-alarma.
Sa pag-abot sa tropa sa lugar ilang nakita si Lambo nga nagbitbit sa .45 caliber pistol ug daw sa lango na kini sa ilimnong makahubog.
Sila nagpaila nga mga polis ug ila nga gimanduan si Lambo nga ibutang ang armas.
Apan imbis mopatuo nabantayan sa kapolisan nga paingon na nga moti-on kanila hinungdan nga ila na lang gipusil.
“Nagpaila na mi nga polis, mition na man hinuon siya, lisud pud og mabutang sa delikado ang atong tropa,” sumala pa ni Santander.Base sa impormasyon nga si Lambo usa ka hitman ug posibleng suspek sa nahitabong pagpamusil niadtong nakalabay nga Sabado sa may Chinese cemetery sa barangay Mabolo.Si SPO4 Alex Dacua, imbestigador sa homicide section sa CCPO, nitug-an nga igo sa nagkadaiyang lawas ang naangkon ni Lambo hinungdan nga nakabsan kini sa iyang kinabuhi.
Nakuha sa kapolisan sa crime scene ang upat ka basiyo sa 12 gauge shotgun, usa ka bala sa shotgun ug usa ka basiyo sa 9mm pistol ug usa ka .45 caliber pistol nga duna’y usa ka magazine nga may lima ka bala nga gituohang iya sa namatay. (Jojo C. Ugdol/GMR)(BANAT NEWS)
- Latest
