CEBU, Philippines - Pagpamaligya og mga pabuto sa bisan asang dapit sa dakbayan sa Sugbo gawas sa firecracker zone nga nahimutang sa South Road Properties (SRP), pangsakmiton.
Ang pangulo sa Cebu City Risk Reduction and Management Council, Konsehal Dave Tumulak, nagkanayon nga sa SRP lang mahimong makabaligya og bisan unsang matang sa pabuto.
Bisan kadtong mga ambulant vendors nga isulod lang sa bag ang ilang baligya nga pabuto mahimo nilang dakpon tungod kay wa kini permit ug wala kini sa SRP.
Nunot niini, giawhag ni Tumulak ang mga opisyales sa barangay sa dakbayan sa Sugbo nga tabangan ang siyudad pag-monitor sa ilang mga barangay kun adunay mga tindahan nga namaligya og mga pabuto.
Nagkanayon si Tumulak nga ang pagpamaligya og pabuto sa mga lugar nga dunay daghang mga tawo, peligro kini sa kaluwasan sa tanan.
Ang siyudad adunay City Ordinance 2290 kon An Ordinance Regulating the sale, distribution, and use of fire cracker and pyrotechnic devices nga nagpahamtang og silot niadtong mga malapason.
Ang kapolisan, kabomberuhan, traffic enforcers, City Health Office, Emergency Medical Service, barangay kapitan, tanod, City Treasurer’s Office, ang adunay katungod nga mosakmit sa mga baligyang pabuto.
Ang gitugot nga ibaligya sud sa mga malls mao kadtong mga pabuto nga molupad ug sa ibabaw mobuto kon pyrotechnics. Ang tanang masakmit nga pabuto adto ihatud sa Bureau of Fire Protection nga maoy mobubo og tubig niini aron di na mapuslan pa. (BANAT NEWS)