Kaso batok sa guwapa gisibog na
CEBU, Philippines - Ang tagdumala sa Cabo Resort sa Asturias miatras sa gipasaka nila nga kaso’ng Estafa batok sa 16-anyos nga maanyag nga babaye nga sayo pa wala dayon makabayad sa iyang pag-estar sa resort.
Matud ni Bise Gobernador Agnes Magpale nga giatras sa resort ang ilang gipasaka nga kaso kay ang P15 mil nga bayronon unta sa maanyag nga babaye didto sa resort gibayran og tawo nga wala pa nila hiilhi.
Gibutyag ni Magpale nga ang maanyag nga babaye anaa gihapon sa kustodiya sa Provincial Social Welfare Development Office (PSWDO) aron ipasusi og usa ka psychologist sa tumong nga masuta ang kahimtang sa iyang pangisip.
Si Magpale miingon nga naghuwat na lang sila sa resolusyon gikan sa piskaliya kun unsay sunod nga lakang apan iyang gitataw nga sila sa Provincial Women’s Council (PWC) ganahan nga mabalik si Bascug sa iyang lungsod sa Sogod, Southern Leyte aron maka-uban ang iyang pamilya.
Makig-alayon ang PWC sa mga social worker sa Sogod aron masabotan ang sunod nila nga himoon para sa maanyag nga usa pa ka menor de-edad. (BANAT NEWS)
- Latest
