Pagbantay kay fake money modagsang

CEBU, Philippines - Ang publiko gipahimangnoan sa kapolisan nga magbantay nga dili mabiktima sa sindikato nga nagpayuhot karon og mga mini nga papel de-bangko, ilabi na karon nga nagsingabot ang Pasko.

Si Supt. Romeo Santander, hepe sa Cebu City Police Intelligence Branch, nagkanayon nga sagad g’yud nga ang mga sindikato mosul-ob sa ilang pagpayuhot og mini nga kuwarta panahon sa Pasko ug Gag-ong Tuig nga daghang tawo.

Matud ni Santander nga karong panahona nagpaniid sila sa mga tawo nga nalambigit niini’ng mao nga binuang diin sagad nga biktimahon mao kadtong tindera o tindahan nga daghan ang namalit nga dili na makahigayon og subay sa kuwarta nga ilang dawaton.

Sigun pa ni Santander nga duna na sila’y gipanid-an karon nga posible’ng muhimo sa maong binuang ug duna na ‘sab sila’y mga barangay dinhi sa dakbayan nga gipaubos og surveillance.

Wala hinuon gitug-an ni Santander kun asa kini nga mga barangay ug kun pila ka personalidad ang ilang gipanid-an.

Sanglit ang pagpayuhot og mini nga kuwarta mahimo man nga mapiyansahan, gibantayan karon sa kapolisan kadto’ng mga tawo nga ila na nga nadakpan sa susama nga kalihukan kaniadto.

Gi-awhag lang ni Santander ang publiko nga magbantay gayud sa pagdawat og kuwarta gikan sa mga tawo nga kadudahan ang linihukan. (BANAT NEWS)