CEBU, Philippines - Usa ka opisyal sa Department of Public Works and Highways (DPWH) mitataw g’yud nga ilegal ang pagpahigayon og night market nga anha himoa sa dalan Colon nga nakahasol og daghan kaayong motorista. Matud ni DPWH legal officer Dean Martin Padoga nga mitambong sa public hearing nga gihimo sa Cebu City Council kagahapon nga supak g’yud sa balaod ang pagpahigayon og night market sa dalan Colon.
Ang tibuok g’yud nga karsada sirad-an ngadto sa mga sakyanan panahon nga ang kagamhanan sa dakbayan sa Sugbo motugot nga adunay night market nga ipahigayon.
Si Padoga mipasabot nga ang dalan Colon, ang labing karaan nga karsada sa tibuok nasud, gideklarar nga national road busa gidili ang pagsirado niini aron lang himoong lugar nga baligyaanan. Miinsister si Padoga nga wala’y katungod ang lokal nga kagamhanan sa pagpasira sa karsada nga nasyonal, kondili ang kongreso lang ang adunay katungod sa pagpasirado niini. Giklaro hinuon ni Padoga nga dili supak ang DPWH sa pagbutang og night market sa dalan Colon apan supak sila nga himuon kini nga permanente. Si Mayor Michael Rama miisyu na og Executive Order 14-7 nga gitawag niya og “Revitalizing Colon Street” diin usa kini sa iyang paagi aron nga ang katawhan mamalik sa pagsuroy diha sa downtown area.
Matud ni Padoga nga ang Presidential Decree No. 17 (Revised Philippine Highway Act) naglatid nga dako’ng kalapasan ang pagsira sa usa ka national highway. Kini bisan pa og ang local nga kagamhanan mohatag pa og alternative route nga magamit sa mga motorista. Ang dalan Colon maoy karsada nga nahimutang sa sentro g’yud nga bahin sa dakbayan.
Panahon nga adunay night market ang mga drayber sa PUJ kanunay’ng magbagolbol kay motaas man ang ilang mga rota. Bisan ang kahugpongan sa mga magpapatigayon diha sa downtown area wala usab makagusto sa kanunay’ng pagpahigayon og night market. Matud ni Jose Soberano III, pangulo sa Colon Merchants Association, nga nakasinati sila og pagmenos sa ilang mga halin sa matag higayon nga adunay night market.
Si Soberano miingon nga ang mga gagmay’ng magpapatigayon magsugod na pag-display sa ilang mga baligya samtang wala pa gani sila manirado sa ilang mga tindahan.
Iyang gisugyot nga unta kun adunay night market mas labing maayo nga adto kini himoa sa mga karsada nga mingaw ug wala kaayo’y mga sakyanan nga mangagi.
Dako usab kaayo ang kahasol sa mga tag-iya og tindahan kay ang night market magbilin og daghang sagbot nga biyaan ra sa mga naninda.
Matud ni Soberano nga kun di man gani mahunong ang operation sa night market, kinahanglan nga estriktohon nga magsugod sila kanang manirado na ang mga dagkong tindahan. (BANAT NEWS)