CEBU, Philippines - Adunay upat ka centenarian sa dakbayan sa Toledo nga posible’ng makadawat og dugang financial assistance nga gisaad sa kagamhanan sa siyudad.
Kini ang gitug-an ni Godofredo Villarta, pangulo sa Office of the Senior Citizens Affairs (OSCA) sa dakbayan sa Toledo.
Ang upat ka centenarian mao sila si Consolacion Eleadora, 110, taga Barangay Kapitan Claudio; Nicolas Sabiwang, 104, taga Campo 8; Tirso Alferez, 103, taga Magdugo, ug Ciriaco Mago, 103, taga barangay Matab-ang. Kada usa kanila makadawat og tag P100 mil.
Apan dugang ni Villarta nga adunay mga rekisitos nga kinahanglang kumpletohon sa maong mga centenarians aron sila makakuha sa financial assistance.
Una niini, gisaad ni Toledo City Mayor John Henry Osmeña nga makadawat og tag P2,500 nga financial assistance ang mga senior citizens sa siyudad isip pinaskuhan.
Human usab giaprobahan sa konseho ang paggahin og pundo nga P11 milyones. Ang dakbayan sa Toledo adunay kapin sa 12,400 ka senior citizens. (BANAT NEWS)