Oplan Iwas Paputok gisugdan sa DOH-7
CEBU, Philippines - Ang Department of Health (DOH)-7 mihingusog na sa ilang kampanya batok sa pagamit og mga pabuto sa pagsaulog sa kapaskuhan ug sa Bag-ong Tuig aron mapakunhod ang mga mabiktima sa pabuto sa Central Visayas
Ang DOH misugod sa ilang kampanya nga “Iwas Paputok” sayo ning buwana matud ni Dr. Lakshmi Legaspi, DOH assistant director. Si Legaspi nagkanayon nga ang mga kawani sa DOH mibisita na sa nagkadaiyang ahensiya sa gobiyerno sa dakbayan ug mga barangay aron sa pagpahibalo sa negatibong epekto sa pabuto sa katawhan.
Sa Disyembre 16 sa miaging tuig ngadto na sa Enero karong tuiga adunay 97 sa mga biktima sa pabuto ang natala sa buhatan.
Kini mas daghan itandi sa samang higayon sa tuig 2013.
Ang mga pabuto nga sama sa piccolo, kwitis, spirate, sparklers, hotdog, flying tiger, thick long, triangle, whistlebomb, watusi, lantaka, fountain, ug onga-onga mao ang sagad hinungdan sa mga nasamdan.
Sa laing bahin, ang Department of Education (DepEd)-7 miawhag sa publiko ilabi na sa mga ginikanan pagsumbong gilayon sa school principal kadtong mga manindahay gawas sa eskuylahan nga nagbaligya og mga pabuto. (BANAT NEWS)
- Latest
