Barangay kagawad mieskapo dihang dakpon

CEBU, Philippines - Usa ka barangay kagawad sa Barangay Kamagayan ang gikatahong miikyas sa kapolisan nga buot untang modakop kaniya tungod sa pag-park sa iyang sakyanan sa usa ka no parking area sa may Pelaez Extension niadtong Lunes. Si Kagawad Diogenes Avila, gidakop unta sa kapolisan apan miikyas kini human nga mipasirit kini og padagan sa iyang itom nga Ford Ranger nga may plate number 7C-114.

Si Police Officer 1 Junrel Buñel ug PO1 Wilson Montalban nga mga sakop sa Mobile Patrol Group (MPG) nakabantay nga nag-parking ang sakyanan ni Avila pasado ala una sa kaadlawon niadtong Lunes sa usa ka no parking area.

Dihang ilang gisusi ang maong sakyanan nasikop nila si Avila nga naa didto sa sulod ug ilaha untang dad-on padulong sa Fuente Police Station apan mipasirit kini padulong sa dalan R. Landon.

Wala na maapsi sa mga sakop sa MPG ang maong barangay kagawad hinungdan nga gilusad ang road blocks sa kapolisan inabagan sa Parian Police Station.

Ang hepe sa MPG nga si Superintendent Artemio Ricabo, miingon nga nadakpan ang kagawad tungod sa kalapasan niini sa balaod sa trapiko. Mihimakak siya sa mga taho nga naabtan sa iyang mga sakop ang kagawad nga may kuyog nga babaye sulod sa sakyanan.

“Lisod kaayo mosulti because wala’y picture or video to prove,” matud ni Ricabo. Sa laing kahibulongang “entry” sa police blotter sa Parian Police Station, dunay natala bahin sa maong hitabo apan wala panghinganli ang mga hintungdan ug nabutang lang ngadto nga may disobedience to a person in authority or the agents of such person. (Bryner L. Diaz/EIM)(BANAT NEWS)