Umahan makabangon usa ka buwan

CEBU, Philippines – Molanat pa sa usa ka buwan una pa makabangon ang agrikultura sa bukirang bahin sa dakbayan sa Sugbo human sa bagyong Ruby matud pa ni Cebu City Agriculturist Joey Baclayon.

“I think it would take one month from now to recover,” sumala pa ni Baclayon.

Mokabat sa 314 ektarya sa 8,800 ektaryang umahan sa 28 ka bukirang barangay sa dakbayan ang gikatahong apektado sa niaging bagyo.

Plano sa lokal nga kagamhanan nga ihatag lang una sa kapin 500 ka mag-uuma ang P5 milyones nga gahin sa mga input products nga gitagana unta sa pag-abot sa El Niño phenomenon.

Kini naglakip sa mga binhi, abuno ug mga ekipo nga magamit sa panguma.

Apan giklaro ni Baclayon nga dili paigo ang P5 milyones nga input products mao’ng iya’ng ipa-assess ang mga mag-uuma nga grabe ang epekto sa agrikultura aron mahatagan og prayoridad.

Gidugang ni Baclayon nga himuon nga second priority ang minus og danyos.

Naglaum si Baclayon nga mahatagan usab og hinabang ang mga Sugbuanong mag-uuma gikan sa Department of Agriculture.

Sa wala pa ang bagyo, gipahimangnoan na ang mga mag-uuma nga mangandam ilabi na sa paghipos sa kahayopan.

Giklaro ni Baclayon nga ang ilang mahatag nga tabang alang lang sa pananum ug kahayopan ug laing departamento ang mohatag sa hinabang pinansyal sa mga apektadong pamilya.

Samtang padayun pa nga nagsusi ang Kapitolyo sa danyos sa agrikultura human sa bagyong Ruby.

Ang agrikultura ang grabeng naapektohan sa bagyong Ruby base sa obserbasyon sa hepe sa Provincial Disaster Risk Reduction Management Office (PDRRMO).

Si Baltazar Tribunalo nagkanayon nga nagkinahanglan siya sa tukmang report sa kadaut sa bagyong Ruby tungod kay kini ang ilang basehan sa emergency response plan.

Matud ni Tribunalo nga dili madali ang pagkuha sa mga detalye tungod kay dili man kini sama sa building sa eskwelahan nga dali kaayong mabana-bana ang kadaut.

Ang hunta probinsiyal nideklarar na nga ubos sa state of calamity ang probinsiya sa Sugbo human sa pagkusokuso sa bagyong Ruby aron ang P77.5 milyones nga calamity fund magamit kini alang sa tabang sa mga biktima. – /GMR) (BANAT NEWS)