CEBU, Philippines – Nagdumili una pagluwat og pamahayag ang department head sa Kapitolyo kinsa nalambigit sa iskandalo human nikatap sa social media ang iyang mga hulagway nga may kagakos nga usa ka babaye nga sama niya nga minyo.
Ang maong department head nihangyo nga sa Committee on Discipline and Investigation (CODI) na siya mohatag sa iyang pamahayag kabahin sa isyu nga iyang gi-atubang karon.
"Sa CODI lang ta motan-aw kung unsa’y attach file naa didto, hangyo lang nako nga dili lang usa ko mokomentaryo ani’ng isyuha," sumala pa niya.
Sa laing bahin, si Provincial Administrator, Atty. Mark Tolentino, mitataw nga naghimo na siya og communication letter ngadto sa CODI aron tukion sa committee ang maong isyu.
Sa pagkakaron mihangyo siya nga respetuhon usa ang matag indibidwal nga nalambigit sa kontrobersiya.
"I don't know if there's any reason for us to put him under preventive suspension because there is no other official involved and the objective of a preventive suspension would be to prevent the officer concern from influencing any investigation, so I don't really see that we can put him under preventive suspension," asoy ni Tolentino. Giklaro hinuon ni Tolentino nga mohatag siya og kasegurohan nga tutukan kini sa CODI ug dili baliwalaon sa kagamhanan sa probinsya. – /GMR) (BANAT NEWS)