Nilikay sa checkpoint gipusil
CEBU, Philippines – Swerte nga nakalingkawas sa kamatayon ang 40-anyos nga lalaki human kini misuway og sukol sa mga polis nga nag-checkpoint pinaagi sa pagbunot sa iyang dala nga armas sa dalan Colon, Pahina Central, dakbayan sa Sugbo niadtong nakalabay nga gabii.
Ang suspek naila nga si Joel Catambacan, taga Balagtas Street, Pahina Central.
Matud ni Chief Insp. Noel Lomente, hepe sa Carbon Police Station, nga samtang na-checkpoint ang iyang mga sakop, kalit lang nibalik sa agi ang usa ka motorsiklo nga gisakyan sa suspek.
Dihang nisuway paggukod ang kapolisan kalit lang nibunot ang suspek sa dala’ng armas apan usa ka polis ang dali sab nga nakapusil sa suspek apan wala nakaigo.
Nidagan si Catambacan ug nahitabo ang ginukdanay paingon sa sirado nga lugar hangtud nitahan ang suspek.
“Swerte pa gyud ni siya kay wala man naigo, misukol ra ba gyud,” matud ni Lomente.
Ang suspek nitug-an nga tuyo niya nga mosibat sa checkpoint gumikan kay wala siya’y dala nga lisensiya ug wala’y rehistro ang motorsiklo ug iya lang gihulaman sa ilang silingan.
Apan dihang gipangutana kung nganong nagdala kini og armas, wala na sab kini motingog. – /GMR) (BANAT NEWS)
- Latest
