Cebu City ubos sa state of calamity
CEBU, Philippines – Human makaangkon og dakong kadaot sa mga pananom ug kahayopan nga misumada og P37 milyones, gipaubos ang siyudad sa Sugbo sa state of calamity kagahapon.
Basi sa natala sa City Agriculture Department, 21 barangays sa bukid ang naapektuhan sa pagkuso-kuso ni bagyong Ruby sa niaging Sabado.
Sumala ni City Agriculturist Joey Baclayon, kapin 300 ektaryang plantasyon sa de-kalikad nga buwak, utanon ug prutas ang nangadaot nga nagkantidad og P36.8 milyones.
Samtang 89 ka hayopan nga nagkantidad og dul-an P150,000 ang naapektuhan usab matud ni Baclayon.
Ang mga apektadong barangay mao ang mosunod; Malubog, Sirao, Taptap, Adlaon, Binaliw, Agsungot, Mabini, Paril, Guba, Lusaran, Tagbao, Bonbon, Pung-ol Sibugay, Sudlon I, Sudlon II, Sinsin, Tabunan, Kalunasan, Sapangdaku, Pamutan, Toong, ug Cambinocot.
Matud ni Baclayon nga nakigtambayayong na ang city agriculture office sa mga opisyal sa upland barangays, Organized Farmers Association ug youth farmers aron makahimo og maayong lakang aron makabawi sa dakong kadaot.
“…to come up with the assessment and evaluation for immediate action, planning and possible allocation of funding to help our affected farming sectors alleviate and recuperate the loss,” sumala ni Baclayon.
Samtang, si Mayor Michael Rama misaad nga motabang ang siyudad pinaagi sa paggahin og pundo aron ipangapud-apod ngadto sa mga apektadong mag-uuma. – /EIM) (BANAT NEWS)
- Latest
