CEBU, Philippines – Pwerteng bun-oga ug naputos sa mga pangos ang usa ka 75-anyos nga retiradong pari human kini gitulis ug gihagbong ngadto sa usa ka sapa sa drayber sa traysikol nga usa diay ka tulisan diha sa Sitio Dual-og, Barangay Dawis Norte lungsod sa Carmen.
Matud pa nga nasuko ang wala mailhing tulisan kay wala kini nakuhang kwarta sa biktimang si Retired Reverend Father Nicolas Batucan nga lumad nga taga Kamalig-Bato, dakbayan sa Danao.
Matud pa ni Police Officer 3 Jerome Quimque, ang desk officer sa Carmen Police Station nga nakahinabi sa Banat News midangop kanila si Batucan ug mipahibalo sa nahitabo.
Sigun pa ni Quimque nga sakay og tricycle ang biktima gikan sa Rallos Street, Poblacion nga paingon unta mopauli.
Apan sumala pa nga igo lang kini nga gituyok -tuyok sa drayber sa maong lugar ug pagkahuman gipangayoan kini og kwarta.
Apan nagdumili siya sa paghatag ug misukol sa suspek hinungdan nga kini gibunlot pagawas sa traysikol ug gitukmod paingon sa sapa-sapa nga duna’y gitas-on mga upat ka tiil hinungdan nga kini nakaangkon og mga garas, bun-og sa kalawasan.
Human sa hitabo dali nga mipasutoy og padagan ang traysikol paingon sa wala masayring direksyon.
Gisusi karon sa kapolisan kun taga Carmen ang maong traysikol sanglit dunay mga traysikol gikan sa mga silingang lungsod ang maabot og hatud og pasahero sa ilang lungsod. Pakyas hinuon ang pari paghulagway sa tulisan, wala usab niini makuha ang plate number sa motorsiklo. – /EIM) (BANAT NEWS)