CEBU, Philippines – Nakapangandam na ang katawhan sa pagsulod sa bagyong Ruby sa nasud hinungdan nga minus ang nangamatay sumala pa sa Office of the Civil Defense-7. Matud ni Allen Froilan Cabaron sa OCD-7 nga dihang nagpaingon pa lang ang bagyong Ruby sa nasud, sub-sob ang gihimo sa kagamhanan sa pagpahibawo sa publiko mahitungod sa dautang epekto sa bagyo nga unang gihulagway nga super typhoon.
Gipasabot ni Cabaron nga apil sa daku og natampo ang paghatag og impormasyon sa media, telebisyon, radio ug newspaper. Nabantayan ni Cabaron nga dili na lisud estoryahon ang mga tawo karong panahona labi na kung bagyo na ang hisgutan human sa bagyong Yolanda.
“Ang primary factor gyud ana ang kaandam sa mga tawo, ang mga tawo mituo na sa mga local government, sa mayor, barangay kapitan nga mas maayo gyud nga preemptive evacuation although di nato kalikayan nga naa gyu’y uban nga kinahanglan og information drive, kinahanglan pa og pagpasabot,” matud ni Cabaron. Samtang gipanalipdan ni Cabaron ang PAGASA nga giingong nasobrahan ra sa ilang forecast sanglit igo lang kini naghimo sa ilang trabaho base sa ilang mga kahimanan.
Sa kinatibuk-an si Cabaron miingon nga nagmalampuson ang gobiyerno sa gihandum nga maluwas ang katawhan sa bagyong Ruby. – /GMR) (BANAT NEWS)