CEBU, Philippines - Ang kadagkoan sa CITOM naglisud g’yud pagsulbad sa problema sa trapiko diha sa Gorordo Avenue gikan sa JY Square ngadto na sa Lahug Elementary School.
Kini tungod kay gidid-an sa CITOM ang mga sakyanan nga gikan sa Sitio Sudlon (Beverly Hills) nga makaliko sa wala paingon sa JY Square gikan sa alas sayes ngadto sa alas nueve sa buntag.
Tungod kay ang mga sakyanan igo lang mo-right turn apan mobalik inig-abot sa unahan, gibutangan sa CITOM og No U-Turn sign ang taliwala sa karsada apan natan-aw nga wala gihapon magsilbi.
Ang CITOM mitangtang sa road separator nga gibutang nila taliwala sa karsada kay natan-aw nga nakahatag lang kini og “traffic hazard” ug gidistinohan og daghang traffic enforcers ang maong dapit.
Karong bag-o lang, ang mga sakyanan nga gikan sa Lahug ug moliko unta sa wala paingon sa Beverly Hills dili na tugotan nga mo-left turn. Didto sa unahan nga eskena atubangan sa JY Square, wala na usab itugot ang left turns atol sa “peak hours” sa buntag ug hapon.
Natan-aw sa ubang motorista nga wala gihapon magsilbe ang mao nga paagi ug wala makasulbad sa problema. (BANAT NEWS)