Mga shabu, armas nasakmit sa 7 ka pushers

CEBU, Philippines - Nadakpan sa kapolisan ang pito ka tawo atol sa managlahing anti-drugs operation sa miaging adlaw.

Nasikop sa mga sakop sa Parian Police Station sila si Ivan Gil Alonza, 28, ug si Marlon Acosta, 29, human nga naatlan sila nga nagdala og duha ka stick sa marijuana. Nakuhaan sab sila og usa ka paltik nga revolver nga may bala. Samtang nasikop sab sa mga sakop sa City Intelligence Branch ang usa ka gituohang pusher atol sa buy-bust operation sa miaging gabii didto sa barangay Kamputhaw, dakbayan sa Sugbo. Ang nasikop mao si Ramil Bolo, 40, taga Kamputhaw nga nakuhaan og56 ka gagmay nga pakete nga shabu ug 12 ka medium size nga shabu. Nakuhaan sab siya og usa ka magnum .22 revolver nga may lima ka bala.

Samtang nasikop sab si Jimmy Abella Jr. nga may warrant of arrest nga giluwatan ni Judge Soliver Peras lakip na sab sila si Jay Labitad, 24, Dodie Gabayan, 30, didto sa Sitio Sandayong , Guadalupe.

Nakuhaan sab ang mga dinakpan og tulo ka medium sized nga pakete nga shabu ug halin niini nga P360. Nasikop sab sa kapolisan sa Danao City si Joel Mata atol sa buy-bust operation. Tulo ka dagkong pakete nga shabu ug upat ka medium sized nga mokantidad og P100 mil ang nakuha.

Si Mata nasakmitan ‘sab og kalibre .45 nga pistola, KG9 machine pistol, mga bala ug drug paraphernalia.  (BANAT NEWS)