Bagyong Ruby mihinay–Pagasa

CEBU, Philippines - Mihinay ang bagyong Ruby  samtang padayon kining nag-irog sa kasadpang amihanang kasadpan sa Eastern Samar-Northern Samar area kini base sa ulahing weather bulletin nga giisyu mga alas 5:00 sa hapon kagahapon.

Tungod sa paghinay niini, wala na kini isipa pa nga usa ka super typhoon. Si Ruby gilauman nga mag-landfall karong Sabado sa gabii sa Eastern Samar-Northern Samar area dala ang kusog nga hangin ug posibleng momugna og storm surge nga dunay gitas-on nga tulo ngadto sa upat ka metros inubanan sa grabeng pag-uwan.   Kagahapon sa alas 4:00 sa hapon ang mata sa bagyo nahimutang sa 370km (kilometer) sa sidlakang bahin sa Borongan, Eastern Samar. Si Ruby dunay hangin nga 195 kph duol sa sentro ug moabot  230 kph ang gikusgon sa iyang unos ug nag-irog sa gipaspason nga 13 kph.

Karong adlawa (Sabado) ang bagyo gibana-banang mahimutang 80 km sa amihanan amihanang sidlakan sa Borongan, Eastern Samar o sa 130 km sidlakan habagatang sidlakan sa Catarman, Northern Samar.

Ang  Northern Samar, Eastern Samar, Samar, Biliran, Leyte, Southern Leyte, Northern Cebu lakip ang Cebu City, Bantayan Island ug Camotes Island gipaubos kini sa public storm warning signal #2.

Ang ubang parti sa Visayas nga gilangkuban sa Capiz, Iloilo, Antique, Guimaras, Aklan, Negros Oriental, Negros Occidental, ubang parti sa Cebu, Siquijor ug Bohol ang gipaubos sa public storm warning signal #1. (Brenda D. Batuto/EIM)(BANAT NEWS)