Romana gihulipan sa CCPO

CEBU, Philippines - Epektibo niadtong Disyembre 4, girelibohan na sa pagka hepe sa Cebu City Police Office si Senior Superintendent Noli Romana subay sa kamanduan gikan sa Campo Crame.

Kini basi sab sa nakuha nga dokumento sa Banat News ma’y labot na sa maong kamanduan. Nakalatid sa maong mando nga mabalhin sa Civil Security Group (CSG) sa Campo Crame si Romana sa wala sab nasayri nga hinungdan.

Si Romana ang lakip sa pito ka mga opisyal lukop nasud nga gipangrelibohan sa ilang posisyon.

Usa ka tuig ug upat lang ka bulan si Romana sa CCPO sukad kini milingkod niadtong Agosto 2 sa nakalabay nga tuig, ang opisyal wa motubag sa tawag sa Banat News aron pagkuha og pamahayag.

Gituohang molingkod isip caretaker sa CCPO si Sr. Supt. Conrad Capa ang deputy chief for operations sa PRO-7 hangtod nga wala pay mapili nga mopuli ni Romana. Tungod sa maong kalamboan, naguol si Cebu City Vice Mayor Edgardo Labella sa  maong balita, si Labella ang pangulo sa Police Coordinating and Advisory Council kun PCAC natagbaw sa performance ni Romana ilabi na batok sa ilegal nga drugas. (Jojo Ugdol ug Khacel Anne Sanchez/EIM)(BANAT NEWS)