Panic buying sa Sugbo

CEBU, Philippines - Tungod sa hulga sa nagsingabot nga bagyong Ruby ug sa kasinatian sa pag-igo sa bagyong Yolanda sa miaging tuig, daghang mga tawo ang nag-panic buying aron masiguro nga duna silay paigong pagkaon ug ubang panginahanglanon.

Apan ang Department of Trade and Industry nagkanayon ngadto sa katawhan nga di moapil sa “panic buying” gumikan kay adunay igong supply ang mga grocery stores sa Sugbo. Matud ni DTI-7 Regional Director Asteria Caberte normal nga reaksiyon sa katawhan ang ‘panic buying’ isip pangandam sa katalagman. Apan matud niya mopalit lang nga igo ra sa panahon sa kalamidad aron makapalit ang uban sa ilang gikinahanglan. “We’re actually now in a typhoon preparedness status,” sigun pa ni Angeli Christi Ladot, manager sa Metro Supermarket sa Ayala Center Cebu. Sagad sa mga konsumidor namalit og mga canned goods, noodles, bottled water, biscuits, bugas ug kape. Gawas pa niana, nitaas usab ang demand sa flashlights, batteries ug kandila.

Matud sa mga mamalitay nga nahinabi sa Banat News, nanigurado lang sila nga makapangandam sa ilang pagkaon tungod sa bagyo. Nipahimangno usab si Caberte ngadto sa mga retailers nga di magpahimus sa kahigayonan sa pagpasaka sa presyo sa ilang mga produkto aron di sila makiha. Si Philippine Retailers Association Cebu Chapter president Robert Go, miingon nga ang panic buying normal ra nga reaksiyon. (BANAT NEWS)