CEBU, Philippines - Preparado na ang tibuok lalawigan sa Sugbo, Metro Cebu ug component cities sa lalawigan sa pagsulod sa bagyong Ruby karong adlawa.
Ang Kapitolyo mipatawag og tigom sa mga sakop sa Provincial Disaster Risk Reduction Management Council (PDRRMC) uban sa mga mayor sa kalungsuran.
Gideklara usab ni Gob. Hilario Davide III nga sugod karong adlawa (Biyernes) ug sa Sabado nga walay klase sa tanang level gikan sa elementarya, high school ug college sa mga publiko ug pribadong eskuylahan sa probinsiya sa Sugbo.
Si Noel Belciña sa Cebu Electric Company (CEBECO) nagkanayon giandam na usab nila ang mga ekipo sa clearing operations ug paghimo og dinaliang repairs sa mga linya sa kuryente nga mangaguba.
Samtang si Grace Rodriguez sa National Food Authority (NFA) nagkanayon nga walay angayang kabalak-an tungod kay daghan ang suplay nga bugas ang lalawigan karon.
Matud niya nga ang bodega sa NFA sa Santa Fe duna kini pundong 7,900 ka sakong bugas, 6,500 sa Tudela, 6,000-7,000 sa Bogo ug 7,000 sa Badian. Ang hepe sa Provincial Health Office (PHO), Cynthia Genosolango nagkanayon nga kadtong mga masakiton nga naghambin og grabeng sakit ibakwit nila sa mga dagkung tambalanan sa dakbayan sa Danao, Bogo, Carcar ug Balamban.
Si Mayor Adelino Sitoy sa lungsod sa Cordova gawas sa pagpangandam misugyot kini sa publiko nga mag-ampo. Sa dakbayan sa Sugbo, gideklarar ni Mayor Michael Rama kagabii pa lang nga walay klase sa tanang level sa public schools kutob sa adlaw nga Sabado. Mag-agad ang siyudad sa dagan sa panahon kun way trabaho ang city hall.
Ang Toledo City, mideklarar nga wala nay klase sa tanang level sa public schools.
Si Mayor Jonas Cortes sa dakbayan sa Mandaue mimando sa pag-andam sa ilang disaster response teams aron makaresponde sa emerhensiya ug ang mga eskuylahan ug gymnasiums nga gamitong evacuation centers.
Samtang ang Central Command mideklara na og red alert status tungod sa bagyo, si Col. Francisco Mendoza Jr., deputy commander for administration nagkanayon nga tanang mga sundalo sa Visayas ang gipakatap na sa mga lugar nga lagmit maigo sa bagyo.
Ang Office of Civil Defense -7 Regional Director Olivia Luces misugyot sa mga LGUs nga mohimo og preemptive evacuation palayo sa mga delikadong lugar. (Brenda D. Batuto, Raymond Abarcas, Jojo Ugdol ug Romeo Limpangog/EIM)