Sugbo gipaubos sa state of calamity preparedness

CEBU, Philippines - Ang tibuok dakbayan sa Sugbo gideklarar na kagahapon nga ubos sa State of Calamity Preparedness agi og pagpangandam sa nagsingabot nga bagyo’ng Ruby nga gikatakda nga moigo sa Central Visayas sugod ugma.

Si Konsehal Lea Japson maoy misugyot nga ideklarar ang dakbayan  nga ubos sa state of calamity preparedness aron makagamit kini sa iyang calamity budget kun adunay panginahanglan.

Ang mga weather forecasters miingon nga ang hangin sa bagyo’ng Ruby magdala og hangin nga 75 kilometros matag takna sa sentro ug takus na kini nga makakuba og kabalayan. Kun walay kausaban, gibana-bana nga karong adlawa makasinati na og uwan-uwan ug hangin ang Sugbo ug ubang bahin sa Central Visayas diin dagko usab ang mga bawod sa kadagatan.

Si Konsehal Dave Tumulak, ang presiding officer sa Local Disaster Risk-Reduction and Management Council, miawhag sa mga opisyal sa kabarangayan nga mangandam ‘sab ug palihukon na nila ang ilang mga Barangay Disaster Councils.

Giawhag usab ni Tumulak ang katawhan nga ilang pul-ongan ang mga sanga sa kahoy nga anaa sa palibot sa ilang kabalayan aron dili kini maluka kun kuso-kusohon na sa bagyo.

Si Mayor Michael Rama mipaapud-apod usab og basahon sa lainlaing kabarangayan nga magtudlo sa katawhan kun unsay buhaton nila aron malikayan ang katalagman.

Matud ni Rama nga sa dili pa moabot ang bagyo, sigurohon g’yud nga lig-on ang kabalayan ug magpundo sila’g mga pagkaon sama sa pan, biscuit ug de lata.

Magpundo usab og igong tubig nga mainom nga molungtad og tulo ka adlaw ug sigurohon nga adunay daghan pa’ng sulod ang LPG nga magamit sa pagluto’g pagkaon.

Dugang ni Rama nga kun moabot na ang bagyo magpabiling kalmado, maminaw sa radyo ug kun mag-brownout  ipalayo ang kandila sa mga panapton.

Sa dakbayan sa Lapu-Lapu, ang mga opisyal sa mao nga dakbayan naglaum nga unta walay kinabuhi nga makalas sa mao nga bagyo. Matud ni Andy Berame sa Disaster Team sa Lapu-Lapu nga aron makab-ot ang tinguha nga zero casualty kinahanglang subsob ang pagsabwag og inpormasyon ug pag-monitor sa balita.

Ang kapulisan sa ilang bahin miingon nga kun ipatuman na ang force evacuation ilang ipaniguro nga dunay mga pulis nga mobantay sa mga gamit nga mabiyaan sa kabalayan.

Samtang ang kabomberohan gideklarar usab nga ubos sa “heightened alert” ug naka- standby aron pagresponde nila kun dunay mga emerhensiya.

Sa Kapitolyo, nangandam na ang Provincial Disaster Risk-Reduction Management Council (PDRRMC) aron makaresponde dayon sila kun moigo na ang bagyo’ng Ruby.

Matud ni Julius Regner sa PDRRMC nga bisan og dili kaayo sama kakusog sa Yolanda ang bagyo’ng Ruby apan dili kini angay’ng kompiyansahan. (BANAT NEWS)