CEBU, Philippines – Nagtingkagol sa prisohan ang usa ka kawani sa buhatan ni Bokal Grecilda “Gigi” Sanchez human naimbargohan og shabu, pistola ug giingong niunay og kuha sa mga alahas ni Sanchez.
Ang suspek mao si Alvin Bicada, 48, taga Guadalupe, dakbayan sa Sugbo, kinsa nasikop sa mga polis niadtong Domingo sa hapon sa sitio Buena Hills, sa maong barangay human dunay nagpaalarma kabahin sa usa ka armadong tawo.
Si PO1 Alfredo Casas sa Guadalupe Police Station nibutyag nga naimbargo gikan sa posisyon ni Bicada ang usa ka paketeng shabu, kalibre .45 nga pistola ug mga alahas ni Sanchez nga nagkantidad tanan og P50 mil. Matud ni Casas nga niadtong Lunes si Bicada napasakaan na og kasong paghupot og ginadiling drugas, illegal possession of firearms ug qualified theft sa piskaliya samtang gitanggong sa Cebu City Jail sanglit wala kini mopiyansa.
Si Sanchez sa iyang bahin, nagkanayon nga si Bicada gidestino niya sa Vicente Sotto Memorial Medical Center (VSMMC) aron moalalay sa mga residente sa ikatulong distrito nga magpatambal nga nanginahanglan og medical nga tabang.
Gibutyag ni Sanchez nga sa milabay’ng mga semana nawagtang ang iyang mga alahas ug dihang gipaubos sa imbestigasyon si Bicada, ang mga alahas nga nawagtang nabawi gikan sa posisyon sa suspek.
Ang maong mga alahas giingong dunay “sentimental value” tungod kay hinatag kini sa inahan ni Sanchez ngadto kaniya. Si Bicada giingong gisaligan ni Sanchez ug makasulod gawas kini sa ilang balay.
Apan matud ni Sanchez nga iya una’ng timbang-timbangon kung mopasaka ba siya og dugang kaso nga qualified theft batok sa suspek.
Si Bicada giingong subject usab kini sa “disciplinary action” sa buhatan ni Sanchez tungod kay duha na kini ka higayun nga wala mopaubos sa drug test. Matud ni Sanchez nga sa paglikay ni Bicada sa drug test natahap na sila’ng nalambigit kini sa ginadiling drugas. Dugang ni Sanchez nga dili siya mo-tolerate sa maong buhat ni Bicada bisan og iya pa kini’ng sakop. – /GMR) (BANAT NEWS)