CEBU, Philippines – Gihangop sa mga sakop sa Mandaue Vendor’s Multi-Purpose Cooperative (MAVENCO) ang tinguha sa kagamhanan sa dakbayan nga pagtukod pagbalik sa merkado sa kanhi nahimutangan niini sa luyo sa National Shrine of Saint Joseph.
Si Mariolito del Castillo, chief operation officer ug general manager sa MAVENCO, nipadayag nga dakung bintaha ang pagbalik sa merkado publiko sa luna nga kanhi nahimutangan niini.
Matud ni Del Castillo nga tuyoon ang nahimutangan sa gitukod nga merkado publiko luyo sa Mandaue City Cultural and Sports Complex.
Gawas nga tuyoon, matud niya nga ang nahisgutang merkado kuyaw sa mga mangomprahay nga molabang sa dakung highway nga daghang sakyanan nga molabay.
Dugang pa niya nga salikwaot na kaayo alang sa mga jeepney kay nadugangan ang gilay-on sa ilang pagbiyahe ug masangit pa sa trapik sa maong dapit. Si Del Castillo miingon nga bisan mahimutang na sa tupad sa Colonade Mall ug Gaisano Grandmall ang tukuron nga merkado wala kini nila ikabalaka tungod kay gawas nga presko pa ang utanon nga ilang gibaligya ug lab-as usab ang ilang isda, ubos usab ang presyo ug mahimo pa’ng mahangyo sa mga pumapalit.
Giangkon ni Del Castillo nga panahon sa adlaw nga Domingo maoy ilang masinati sa karaang merkado publiko ang pagdasok sa mga pumapalit tungod kay ang gikan nga nanimba adto mohapit sa pagpamalit sa ilang mga baligya. – /GMR) (BANAT NEWS)